Dialog im Dialekt: „Metzger Schwarer’s Leiche“

„He oida! Voi wüd! Host scho‘ g‘hert, dass beim Schwarer a Leiche g’fund‘n hab’n?“
„Was echt? Beim Metzger Schwarer? Na is‘ des oag!“
„Ja, hinten im Kühlraum. Daschossn is‘ er worden.“
„Wer?“
„Ja da Tote!“
„Aso, oiso war de Leiche männlich?“
„Ja du Idiot! Horch hoit zua!“
„T’schuldigung“
„Jo, oiso de Leich, de männliche, hob’n se im Kühlraum vom Metzger Schwarer g’fund‘n und se vermuten, dass der Tote, oiso de männliche Leiche fia di zan mitschreib’n, daschossn `word‘n is.“
„Wer san de?“
„Ha?“
„Ja du host g‘sogt se hob’n erm g’fund’n. Wer san de, oiso hoit se?“
„Aso, ja de Schante.“
„Wer?“
„De Polizei! He, i glaub du saufst!“
„Manchmal.“
„Aso.“
„Ja und wer war der Tote. Weiß ma‘ des?“
„Da Hinterbauer Franz.“
„Na! Der war do no so jung.“
„Tjo, kost da hoid nid aussuch‘n wannst daschossn werst, ni.“
„Puh, ja do host recht.“
„Oiso i glaub ja, dass da Hias war.“
„Was fia a Hias?“
„Da Kreschbauer Hias, du Zipfe.“
„Der? Na wieso soid der sowas tuan?“
„Wei‘ da Hias en Franz sei Frau hobn woit!“
„Wos? Oba de woit da Franz jo eh söba nid!“
„Jo oba freiweillig hergeb’n woit der de a nid.“
„Stimmt.“
„Da Hias hot jo mit da Rosl a Pantscherl g‘hobt.“
„Was hat da Hias mit dera g‘habt?“
„A Pantscherl, a Gspusi. Meine Güte, du bist oba a begriffstutzig.“
„T’schuldigung. Ah, und wer is‘ die Rosl hiatz nomoi?“
„Jo de Frau vom Franz!“
„Ah ned vom Hias?“
„Na! Ge bitte, reiss di zam! Da Franz woa mit da Rosl verheiratet und da Hias hot mit derch oba a Pantscherl ghobt.“
„Aha. Und donn hot da Franz den Hias daschossn, weil da Franz herausg‘funden hat, dass de Rosl mit’n Hias a Verhältnis g‘habt hat.“
„Was? Na! Du Trottl, da Hias lebt jo no!“
„Ah sem is‘ er nid tot?“
„Na! Da Franz is‘ tot. Und i glab, dass da Hias den Franz daschossn hot, weil da Hias de Rosl, oiso en Franz sei Frau, gern g‘habt hätt.“
„Jo des ergabat an Sinn.“